By Zweli Martin Dlamini

GEGE:Liphini LaNdvunankhulu imphunga Themba Masuku, kutsiwa lashaya ngendvuku phansi etama kuvimba takhamiti takuGege eSigodzini saseShiselwini ngesikhatsi tiyewembula ingubo eNkhosini  kulandzela kucoshwa emhlabeni wato ngumtjali timali John Shangnam, lekusolakala kutsi wekudzabuka eveni le-Shayina sihlenge se-Taiwan.

Akhuluma naleliphephandzaba le-Swaziland News,Thulani Lukhele losakhamuti kuleyandzawo utsi batakhamiti takuGege bakhipha tinkhomo letimbili solo betama kutigicita eNgwenyameni ngaloludzaba lwekuboshelwa umtfwalo kuleyandzawo yaboKhokho babo kodvwa Masuku lona, lobekanguMphatsi sifundza ngaleso sikhatsi washaya ngendvuku phansi watsi tinkhomo tabo setabola,ngako-ke ngeke bayibone iNgwenyama.

Enaba kuloludzaba,Lukhele utjele leliphephandzaba kutsi baze basitwa ngulomunye babe wakaShongwe losebenta neNgwenyama lowatsi kube akuve kundzindza nekukhala kwabo, wase-ke uyabafukamela njengemantjwele afukamelwe sikhukhukati,wabetfwala wabamikisa khona ngco! eNgwenyameni yemhlaba.

“Besiya eNkhosini,sacala ngekucela umhlonishwa Themba Masuku asenguMphatsi Sifundza kutsi abe lincusa letfu,sacela yena-ke kutsi asendlulise. Hhawu,salindza-salindza kwashona lilanga,sabona kutsi ayikho lena sase siphuma ngalenye indlela. Sacela lomunye, bekungu-malume,mkhulu wakaShongwe kutsi siyongena naye eMbangweni bekuneMhlanga.Hhawu vele safika-ke besekuhlwa nje ntsambama. Nasifika lapho wala, wacala wala nekutsi nje sibhalise Themba Masuku,lekungu-Deputy Prime Minister manje.Wala kutsi sibhalise watsi tsine tinkhomo tetfu tibolile akukameli singene. Watsi futsi indzaba yetfu akukameli ifike eNkhosini.Hhawu,sase siyangena ngalokutsi natsi sibakhona lakaNgwane futsi singemaSwati,” kusho Lukhele losaKhamuti sekudzabuka ku-Gege achazela tintsatseli taleliphephandzaba le-Swaziland News.

Kutseke kuleliviki, leliphephandzaba letama kukhulumisana neMnumzane Albert Mndziniso lekutsiwa unguye Mahlalesangweni waleli-Shayina, kodvwa uvele wavuka umbhejazana, wangatsandzi kuphendvula labutwa kona.

Luhla lwemibuto lutfunyelwe kilo Liphini laNdvunankhulu Themba Masuku ngaloludzaba, kodvwa nakucoshwa lombiko bekasengakaphendvuli .

Ngakulolunye luhlangotsi, lendzaba yakuGege yekucoshwa kwaletakhamiti emhlabeni wato nguleliShayina lekudzabuka esihlengeni se-Taiwan iyimphicabadzala kulandzela kutsi noma letakhamiti tagcina tikhonile kungena eNgwenyameni yemhlaba, kuze kube ngunamuhla solo tiyachubeka nekuba bomadzindvwa yimvula,atikavumeleki kulima,kungcwaba tihlobo tato kanye-ke nekukhotsisa imfuyo emadlelweni.

Kutsiwa inhlupheko yacala eminyakeni lengalinganiswelwa kulesikhombisa,loku kusho kutsi yacala ngemnyaka wetinkhulungwane letimbili neminyaka lelishumi nesitfupha(2016), ngesikhatsi kufika leliShayina lekutsiwa lingumtjali timali, nebangani balo kutemabhizinisi bagwamandza lendzawo bayibita ngelipulazi.

Ekubeni bayigwamandze lendzawo yaku-Gege,kutsiwa bahlanyela tihlahla babese bashaya ngendvuku phansi kutsi kubete lovumela tinkhomo kutsi tiphume imphunga, lenye imfuyo yato letakhamiti kutsiwa yatfunjwa yayobekwa endzaweni lengatiwa.

Senator Dlamini,lolilunga lelicembu letepolitiki i-Economic Freedom Fighters of Swaziland ( EFFSWA)lelitihambela embili tindzaba temhlaba nekuhlukubeteka kwebantfu emimangweni, utjele leliphephandzaba lesive kutsi lesimo saku-Gege siyi-mvisabuhlungu,siletsa lusizi kantsi sinjalo-nje,siyadzabukisa.

“Lesimo sakuGege Nkhosi sibuhlungu kakhulu ngoba labantfu bakucocela kutsi baphile kuleya ndzawo kanye naboKhokho babo iminyaka leyengca ekhulwini. Uma babala kusukela ngetikhatsi tabo-Sobhuza,labanye labaneminyaka leyengca kulengemashumi lasiphohlongo(80)bayaveta kutsi batalelwa khona kuleya ndzawo,” kusho Senator Dlamini lolilunga le-EFF lelibuke luphiko lwetindzaba temhlaba.